Bollywood Ke Aaj Tak Ke 10 Sabse Handsome Hero

4 saal pehle Bhartiya Cinema ko 100 saal poore huye aur in 100 saalon me kayi chehro ne Bollywood par raaj kiya. Hazaaro dilon ki dhadkanein badha di aur apne aakarshak vyaktitwa se logo ko rijhaaya. To chaliye dekhte hain, Bollywood ke  ab tak ke sabse handsome 10 heroes kaun hai:

1. Balraj Sahni 

Inka janm 1913 me hua tha. Ye filmo ke sath naatak me bhi kaam karte the. Dharti ke laal, Do Bheega Zameen, Kabuliwala yaha unki kuch prasiddha filmein hain. Ye prakhyaat Hindi lekhak Bhishm Sahni ke bhai the. Ye khud bhi Angrezi aur Punjabi me lekhan karte the.

2. Dev Anand 

Is evergreen hero ko lagbhag har vyakti jaanta hai. Yaha sirf actor nahi the balki inhone kayi filmon ke liye lekhan aur nirdeshan kiya. Inhe ‘Padmabhushan’ aur ‘Dada Saheb Phalke Award’ se nawaaza gaya tha. Inhone apne 65 saal ke career mein 114 filme ki, jisme se 92 filmo me unhone hero ka role kiya tha.

Times Of India me Dev Anand par chhape is lekh ki maanein to ek samay Dev Anand ko black suit pehen kar public me jaane ki manahi kar di gayi thi. Aisa isliye ki black suit me Dev Anand ko dekh kar ladkiyaan itni deewani ho jaati thi ki kuch ladkiyan balcony se hi kood padti thi!!

3. Dharmendra 

Inhone zyadatar action filmo me kaam kiya. Lekin chupke-chupke jaisi halki-fulki fime bhi ki. Inhe inke fans pyar se, “Action King’ aur “He-Man” bulaate hain. 2012 me inhe “Padmabhooshan” puraskaar se nawaaza gaya aur inhe “Filmfare Lifetime Achievement Award” bhi mila hai.

4. Rajesh Khanna 

Yaha ek abhineta, film nirmaata the. Inhe Bharat ka pehla ‘Superstar’ ya ‘Original Superstar’ kaha jaata hai. Inhone 1969 se 1971 ki Awadhi me lagataar 15 superhit filmo mein hero ke taur par abhinay kiya, jo aaj bhi ek record hai.

5. Hrithik Roshan 

Purane actor Rakesh Roshan ke bete, Hrithik apni acting ke sath-sath dance ke liye bhi famous hai. Yaha Bharat ke sabse zyada kamaane waale actors mein se ek hain. Inhone bachpan me bhi kuch filmon me kaam kiya tha. Filmo me vibhinna prakaar ke roles karne ke liye ye jaane jaate hain.

6. Shahid Kapoor 

Apne career ke shuruat mein Shahid ne Naseeruddin Shah aur Satyadev Dubey se acting ke paath liye. Inhone aajtak Chup Chup Ke, Haider aur Chance Pe Dance jaisi kayi hit film di hai. Apne handsome look ke sath-sath yaha apne dance ke liye bhi jaane jaate hain.

7. John Abraham 

Apne career ki shuruat modelling se karne waale john Abraham ne ab tak kayi action aur comedy filmon me kaam kiya hai. Housefull 2, Dostaana, Madras Café yaha unki kuch hit filmein hai. Iske sath me waha film ‘Vicky Donor’ ke nirmaata bhi reh chuke hain.

8.Ranbir Kapoor 

Kapoor khaandaan ke acche looks aur acting ka talent Ranbir Kapoor me dekhne ko milta hai. Inhone vibhinna vishayon par fimein ki hain. Rockstar, Rocket Singh aur Wake Up Sid mein unki bhoomikaaon ko hamesha waahwaahi mili hai.

9. Tiger Shroff

Film Heropanti se apne film career ki shuruaat karne waale Tiger,Martial Arts me maahir hain. Inki sabhi filmon me waha stunt zyadatar khud karte hain. Mahaj 27 saal ke Tiger ki kayi ladkiyaan deewani hai.

10. Milind Soman 

Milind Soman bhale hi abhi acting ya modelling na karte ho, lekin waha Bharat ke sabse pehle super-model rah chuke hain. Hazaaron ladkiyaan inki deewani hai. Aajkal waha Breast-Cancer ke silsile me jan jaagriti karne ke liye mahilaaon ko marathon me hissa lene me prashikshit karte hain.

Asvikaran: Bollywood ke yaha 10 sabse handsome hero ki suchi lekhika ki apni pasand aur shodh par aadhaarit hai. Dusbus is suchi se sahamati rakhe, yah kadaapi zaroori nahi hai!!